Antoine de Saint-Exupéry qu'es vadut a Lion, lo 29 de Junh de 1 900. Que passè lo son mainatjum ençò de la soa sian, pròishe d'Amberieu puish que hadó sos estudis entà Senta-Crotz deu Mans, en Soïssa, e a París on preparè l'Escòla Navau. Totun que's manquè l'orau deu concors d'entrada ad aquesta escòla : que decideish alavetz de seguir los corrs de l'Escòla de las Bèras-Arts. En 1921, que hè lo servici militari en Estrasborg, hens l'armada de l'aire. Qu'apren a pilotar, e autalèu, la soa carrièra qu'es aviada. Au sortir de l'armada, en 1923, que hè mantuns mestèirs. Que's bota a escríver e publica, en 1925, lo son prumèr raconte que l'accion se'n situeish hens lo monde de l'aviacion. En 1926, Saint-Exupéry entra ençò de Latecoèra, societat d'aviacion qui encamina lo corrièr de Tolosa a Dakar, com pilòte. Puish, qu'es nomat cap d'escala de Port-Juby, hens lo Rio de Oro. Qu'es en aquera tempsada qu'escriu Courrier Sud (1929). Dab Mermoz e Guillaumet, s'avia decap a l'America deu Sud entà estudià'i la possibilitat de crear navèras linhas aerianas. Que publica, en 1931, Vol de Nuit que l'escaduda n'es un succès màger. Totun, la societat Latecoèra que hè la cabuishada : estacat a Air-France en 1935, qu'ensaja de bàter lo recòrd París-Saïgon en avion, ensai mau-escadut. Puish en 1938, qu'ensaja de religar New York dinc a la Tèrra de Huec : alebat grevament au cors de l'assai, que passa longas mesadas de convalescéncia a New York. Publica alavetz Terre des Hommes (1939). Mentre la Segonda Guèrra Mondiau, que hadó partida de l'armada de liberacion : lo pilotatge li èra interdit pr'amor de la soa edat. Totun, Saint-Exupéry insisteish entà obtiéner missions : lo 31 de julh de 1944, que s'envòla de Borgo en Corsega. Ne'n tornarà pas jamei. Pendent la guèrra, que publiquè tres obratges : Pilote de guerre, Lettre à un otage, e Le Petit Prince en 1943.

Permèir publicat en 1995, aquí qu'es prepausada ua navèra arrevirada, demiada per Eric Chaplain, autor, editor e arreviraire en lenga nòsta desempuish mei de trenta ans.